ح ـلقت الطائره بـمغتربهـ .. ~

ع ـدت والعود أحمد ...~


قلت بعد قبولي ابتدا المشوار .. مشوار الغربه والابتعاد عن الاهل الحمدلله الي ساعدني ان امي بتيي معاي باول فترهـ وهالشي وايد ونسني .. رحت وحجزت من قرادت حظي على طيران لوفتانزا هالطيران للاسف فاشل بدرجه كبيره مقاعده ضيجه والممرات صغيره وزحمه وكله ريحة مشروب والمضيفات نفسيه  صراحه مستحيل اروح بهالطيران مره ثانيه بس ردتي بتكون فيه لاني حاجزه .. كانت رحلتي (( كويت .. فرانكفورت .. منطقتي الجمليه )) .. كانت مدة رحلتي مع الترانزيت 26 ساعه رحله متعبه حيل حيل ...~



بمطار الكويت ... ~ 


الساعه : 12:30


اللكل حواليني يودعني اخواني وخوالي وصديقاتي .. لحظات وايد صعبه بس ماحسيت بشي لحظتها يمكن لان امي معاي !!..الشي الوحيد الي حسيته اني ابتعدت عن ديرتي الي احس فيها بالامان .. واقلعنا لفرانكفورت .. الطياره ماكانت زحمه فقلت انام وارتاح بهالساعات .. المشكله ان الطيران فاشل بس ماحسيت بفشله بهالفتره لما اللحين ..~ 

 واحنا قاعدين سمعنا صوت شي يطيح عالارض ولا واحد تشنج وينادون بالطياره اذا في مسعف او دكتور واعلن الكابتن نزولنا في اسطنبول وهالشي صدمني مفروض يكون في احد عالاقل مسعف خاصه ان الرحله طويله .. وكان في دكتور حاول يساعده والحمدلله قام وقالو ان خلاص بنكمل لي فرانكفورت .. طار الوقت بسرعه ووصلت لمطار فرانكفورت ..~ 

اول ما نزلنا حسيت نفسي متوهقه ماعرف وشسوي ولاول مره اسافر بدون ابوي .. رحنا وكلمنا واحد نساله شنو نسوي والحمدلله طلع عربي .. وساعدنا ودخلنا من فئه vip ما حسيت بالزحمه بس عقب التفتيش عندنا 7 ساعات!!! شنسوي فيهم ؟؟ المطار كبير كبير حيل .. ركبنا قطاراتهم المعلقه والمناظر حلوه كانت ..~

صادفنا واحد تركي ومن عرف ان احنا مسلمين استانس وقاعد يساعدنا وقالنا روحو المسيد اخذو لكم غفوه من التعب رحنا ودورنا .. لقينا كنيسه .. ومعبد لليهود .. ومسيد .. حق كل ديانه حاطين مكان عبادتهم هالشي عجبني حيل ..~  الالمان شوي منفسين ومايعطون ويه جنه يبون يتهاوشون .. وانتهى مشوارنا بفرانكفورت الي ماحبيت وضعها كلش .... ~





ركبنا للمره الثانيه الطياره بس هالمره كانت متروسه حدها ضيييج وحر ولوعه وكل واحد ماسك مشروبه ويشرب ريحه خايسه والمضيفات نفسيه حيل .. بهالعشر ساعات تعبت وايد نفسيا مانمت من الريحه ولا قدرت اسوي شي بس قعدت احسب بالوقت .. بقى 7 .. يالله هانت بقى 4 .. يالله واخيرا بقى ساعتين .. هاذي الكلمات بس الي كانت تيي ببالي وقتها .. ~




ولما سمعت خبر هبوط الطياره استانست حيل وربطت الحزام بشوق وبخوف ومستقبل مجهول !!

اول ما نزلنا لقينا وحده تساعدنا في تعبئه الاوراق ورحنا وختمنا جوازاتنا وكل شي تم على خير ..~


تم استقبالنا .. ورحنا للفندق على طول لان كانت الساعه 9 بليل .. بطني تطلع اصوات .. يوعانه رحت وقلت لصديقتي الي معاي واقترحت ان نطلب بيتزا اون لاين .. طلبنا وصنعنا بيتزتنا واحنا مستانسين وصلنا للدفع كتبنا كل شي وكل البيانات ووصلنا لرقم المنطقه .. دقينا عالاستقبال مافهمتنا حاولنا نتواصل مع اي احد نعرفه من امريكا كلهم بزي ... ونمت وانا انطر جواب لهالرقم ..~




قمت وانا متشوقه ابي اسوي بطاقه البنك .. ادور سكن  واعرف اكثر عن جامعتي !!.. ~



هل راح القى سكن بسرعه ولا اتاخر وشنو بيصير لي وشنو سالفة الحفلات الاسبوعيه لسكن الجامعه ... الوحده!! .. المستقبل !! ..~



كل هالاجوبه ... قريييبااااا ... ~

مغتربهـ في امريكا ...~

السسلآم ع ـليكمـ ..~


أول كـتاباتي في هـاذيـ المدونهـ .. ~


رآآحـ أسولف عن كلـ الاحداث الي صارت لي من يوم قبولي أو تقديمي لأوراقي .. ~



يوميات طالبهـ كويتيهـ مغتربهـ .. ~


بسم الله .. يوم اعلان النتائج...!!! كنت متشوقهـ وناطره على نار حالي من حال كل طلبه الثانويه العامه .. كنا متشوقين الي خايف والي متامل والي واثق انا الصراحه كنت خايفهـ حيل خاصه بعد ما انخفست درجتي من الي صار لنا بالكورس الاول .. بالبدايه قالو لنا الاعلان بيكون الساعه 3 ولما الساعه 5  يالله طلعت .. وللاسف ..!! طلعت نتيجتي اقل مما توقعت وضاع طموحي بأني ادخل كلية الطب بالبحرين .. بعدها فكرت بثاني شي احبه واهو الهندسه .. رحت وبلغت اهلي اني ابي هندسة بترول بامريكا  طبعا بالبدايه كلهم قالو لي امريكا بعيده وغربه صعبه لكن اصريت على قراري ووافقو الحمدلله ..رحت وبطلت موقع التقديم وقدمت رغباتي واوراقي ..بعدها باسبوعين بلغونا ان الاحد تطلع اسماء القبول ....~



كنت يومها ببيت صديقة امي نحتفل بعيد ميلاد حفيدها ومستانسه وكنت داشه على احد المواقع ولا اقرا خبر نزول اسماء المقبولين .. بأحد المنتديات واحد من الاعضاء بس فتحت معاهـ الاسماءء ولما بلغته بأسمي ونسبتي .. كتبلي هالجمله (( اسمج مو موجود مع المقبولين )) .. نعم !!!! صدمممهـ كانت لي بجيت وبجيت ورديت البيت عشان اجيكـ .. كان في ضغط عالمواقع فما فتح وضليت لي الساعه 4 الفير سهرانه احاول بأي طريقه افتح الموقع ..بعدها اعلنو بالتويتر ان تم ارسال لكل طالب وطالبه مقبوله خبر قبولهم بمسجات ...!!! انا ماوصلني شي فقققدت الامل .. رحت الصبح بلغت ابوي اني بعيد 12 واني بشد حيلي عشان احقق طموحي .. انصدم قالي تعيدين كل التعب والسهر والدراسه ؟؟!!..سكت وخلاني افكر بروحي ..~


بعدها بساعتين بطلت جريده من جرايد الالكترونيه  بالايباد لقيت الاسماء وبنفس الوقت كانت امي تكلمني وتأنب ضميري اني ما يبت النسبه المتوقعه ولا اقرا اسمي من المقبولين لفيت عليها وصرخ ماما انا انقبلت هندسه انقبلت .. والحمدلله انقبلت بالتخصص الي انا ابيه هندسه بترول بامريكا .. وبخمس دقايق كان صراخي وصراخ اختي وكلمات امي وابوي وملامح الفرحه بويهم ..~



هني بدا المششوآآآآآر ... ~